സീറ്റില്ലെങ്കില് സൗഹൃദമത്സരത്തിന് തയ്യാറെന്ന് ലീഗ്,ഇത്തവണ സീറ്റ് കിട്ടിയേ തീരൂ, കോട്ടയം ജില്ലാ പഞ്ചായത്ത് മുണ്ടക്കയം ഡിവിഷൻ ആണ് ലീഗ് ആവശ്യപ്പെടുന്നത്
ജില്ലാ പഞ്ചായത്ത് സീറ്റ് വിഭജന ചർച്ച യുഡിഎഫില് വഴിമുട്ടി. ഇത്തവണ ഒരു സീറ്റ് വേണമെന്ന് വാദത്തില് ലീഗ് ഉറച്ചു നില്ക്കുന്നതാണ് പ്രതിസന്ധിക്ക് കാരണം.
എന്നാല് സീറ്റ് ലീഗിന് നല്ക്കേണ്ടതില്ലെന്ന നിലപാടിലാണ് കോണ്ഗ്രസ് ജില്ലാ നേതൃത്വം.
കഴിഞ്ഞ പ്രാവശ്യം കോട്ടയം ജില്ലാ പഞ്ചായത്തില് ആകെ ഉണ്ടായിരുന്നത് 22 സീറ്റുകള്. അതില് 14 ഇടത്ത് കോണ്ഗ്രസും, എട്ടിടത്ത് കേരള കോണ്ഗ്രസ് ജോസഫ് വിഭാഗവും മത്സരിച്ചു. അന്നും ഒരു സീറ്റ് വേണമെന്ന ലീഗിൻ്റെ വാദം ഉമ്മൻചാണ്ടി ഉള്പ്പെടെയുള്ള നേതാക്കള് അംഗീകരിച്ചില്ല. അടുത്ത തവണ ലീഗിന് ഒരു സീറ്റ് നല്കാമെന്ന് ഉമ്മൻചാണ്ടി വ്യക്തമാക്കിയിരുന്നതായും ലീഗ് നേതാക്കള് പറയുന്നു. ഈ സാഹചര്യത്തിലാണ് ഇത്തവണ ഒരു സീറ്റ് വേണമെന്ന വാദത്തില് ലീഗ് ഉറച്ചുനില്ക്കുന്നത്.
ഒരു സീറ്റ് കൂടി വർദ്ധിച്ച് ഇക്കുറി ജില്ലാ പഞ്ചായത്തില് ആകെയുള്ള സീറ്റുകളുടെ എണ്ണം 23 ആണ്. മുണ്ടക്കയം ഡിവിഷൻ ആണ് ലീഗ് ആവശ്യപ്പെടുന്നത്. എന്നാല് 15 സീറ്റില് മത്സരിക്കാനാണ് കോണ്ഗ്രസിന്റെ നീക്കം. ഇത്തവണ സീറ്റ് കിട്ടിയില്ലെങ്കില് ശക്തമായ നിലപാട് സ്വീകരിക്കുമെന്നാണ് ലീഗ് ജില്ലാ നേതൃത്വം കോണ്ഗ്രസ് നേതൃത്വത്തെ അറിയിച്ചിട്ടുള്ളത്.
