ശബരിമല പാതയിൽ കണ്ണഞ്ചിപ്പിക്കുന്ന ലൈറ്റുകൾ; മുണ്ടക്കയം-കോരുത്തോട് റോഡിൽ അപകടഭീഷണി: തീർത്ഥാടക വാഹനങ്ങൾ രാത്രിയിൽ ഹൈബീം ലൈറ്റുകൾ

ശബരിമല മണ്ഡലകാലം സജീവമായതോടെ മുണ്ടക്കയം-കോരുത്തോട് കാനനപാതയിൽ രാത്രികാല യാത്ര ദുഷ്കരമാകുന്നു. തീർത്ഥാടക വാഹനങ്ങൾ രാത്രിയിൽ ഹൈബീം ലൈറ്റുകൾ (ഡിം ചെയ്യാതെ) ഉപയോഗിക്കുന്നത് എതിരെ വരുന്ന വാഹനങ്ങളുടെ കാഴ്ച മറയ്ക്കുന്നതായും ഇത് അപകടങ്ങൾക്ക് കാരണമാകുന്നതായും പരാതി ഉയരുന്നു.

ഇതരസംസ്ഥാനങ്ങളിൽ നിന്നും എത്തുന്ന ഭൂരിഭാഗം വാഹനങ്ങളും ഡിം ആന്റ് ബ്രൈറ്റ് സംവിധാനം കൃത്യമായി പാലിക്കാത്തത് എതിരെ വരുന്ന ഇരുചക്ര വാഹനയാത്രക്കാരെയും മറ്റും സാരമായി ബാധിക്കുന്നു.വളവുകളും ഇടുങ്ങിയ ഭാഗങ്ങളും നിറഞ്ഞ കോരുത്തോട് റോഡിൽ പെട്ടെന്നുണ്ടാകുന്ന കാഴ്ചമറയൽ വലിയ അപകടങ്ങളിലേക്കാണ് നയിക്കുന്നത്.കഴിഞ്ഞ ദിവസങ്ങളിൽ ശബരിമല തീർത്ഥാടകർ സഞ്ചരിച്ച വാഹനങ്ങൾ നിയന്ത്രണം വിട്ട് മറിഞ്ഞും മറ്റ് വാഹനങ്ങളിൽ ഇടിച്ചും നിരവധി അപകടങ്ങളാണ് മുണ്ടക്കയം ഭാഗത്ത് റിപ്പോർട്ട് ചെയ്തിട്ടുള്ളത്

“രാത്രികാലങ്ങളിൽ എതിരെ വരുന്ന വാഹനങ്ങൾ ഡിം അടിക്കാത്തത് കാരണം റോഡിന്റെ വശങ്ങൾ കാണാൻ കഴിയുന്നില്ല. ഇത് പലപ്പോഴും ബൈക്ക് യാത്രക്കാരെ റോഡരികിലെ കുഴിയിലേക്കോ മതിലിലേക്കോ ഇടിക്കുന്ന അവസ്ഥയിലേക്ക് എത്തിക്കുന്നു,” എന്ന് പ്രദേശവാസികൾ പറയുന്നു.

സുരക്ഷാ മുന്നറിയിപ്പുകളും മോട്ടോർ വാഹന വകുപ്പിന്റെ പരിശോധനയും കർശനമാക്കണമെന്നാണ് നാട്ടുകാരുടെ ആവശ്യം. ഡിം അടിക്കാതെ വരുന്ന വാഹനങ്ങൾക്കെതിരെ നടപടി എടുക്കണമെന്നും ബോധവൽക്കരണം നൽകണമെന്നും ആവശ്യം ശക്തമാണ്.