ചിറക്കടവിൽ ചരിത്രം തിരുത്തി സ്വതന്ത്രൻ; വികസനകാര്യ സ്റ്റാൻഡിങ് കമ്മിറ്റി ചെയർമാനായി ആന്റണി മാർട്ടിൻ

ചിറക്കടവ് ഗ്രാമപഞ്ചായത്തിൽ റെക്കോർഡ് ഭൂരിപക്ഷത്തോടെ സ്വതന്ത്രനായി വിജയിച്ച ആന്റണി മാർട്ടിനെ വികസനകാര്യ സ്റ്റാൻഡിങ് കമ്മിറ്റി ചെയർമാനായി തിരഞ്ഞെടുത്തു. പഞ്ചായത്തിന്റെ ചരിത്രത്തിലാദ്യമായാണ് ഒരു സ്വതന്ത്ര സ്ഥാനാർത്ഥി സ്റ്റാൻഡിങ് കമ്മിറ്റി അധ്യക്ഷ പദവിയിൽ എത്തുന്നത്.

കേരള കോൺഗ്രസ് നേതാവായിരുന്ന ആന്റണി മാർട്ടിൻ, കഴിഞ്ഞ ഭരണസമിതിയിൽ ആരോഗ്യ-വിദ്യാഭ്യാസ സ്റ്റാൻഡിങ് കമ്മിറ്റി ചെയർമാനായിരുന്നു. എന്നാൽ ഇത്തവണ തന്റെ സിറ്റിംഗ് സീറ്റിൽ സ്ഥാനാർത്ഥിത്വം നിഷേധിക്കപ്പെട്ടതിനെ തുടർന്ന് അദ്ദേഹം സ്വതന്ത്രനായി ജനവിധി തേടുകയായിരുന്നു. വോട്ടർമാർക്കിടയിലുള്ള വ്യക്തിപരമായ സ്വാധീനവും വികസന പ്രവർത്തനങ്ങളും അദ്ദേഹത്തിന് റെക്കോർഡ് ഭൂരിപക്ഷം സമ്മാനിച്ചു.

പഞ്ചായത്ത് ഭരണത്തിൽ എൽ.ഡി.എഫ് നേതൃത്വത്തിലുള്ള ഭരണസമിതിക്ക് ആന്റണി മാർട്ടിന്റെ പിന്തുണ അനിവാര്യമായി വന്ന സാഹചര്യത്തിലാണ് നിർണായകമായ വികസനകാര്യ സ്റ്റാൻഡിങ് കമ്മിറ്റിയുടെ അധ്യക്ഷസ്ഥാനം അദ്ദേഹത്തിന് നൽകാൻ തീരുമാനമായത്.