കാടിനുള്ളിൽ വന്യമൃഗപ്പേടി, നാട്ടിൽ പ്രളയമൊഴിഞ്ഞ വീടുകൾ; വന്യമൃഗ ഭീതിയും പ്രളയബാക്കിപത്രവും മറയാക്കി വാറ്റുസംഘങ്ങൾ; മുണ്ടക്കയം മലയോര മേഖലയിൽ സമാന്തര സാമ്രാജ്യം

വന്യമൃഗ ശല്യം കാരണം ജനങ്ങൾ പ്രവേശിക്കാൻ മടിക്കുന്ന വനാതിർത്തികളും ആളൊഴിഞ്ഞ എസ്റ്റേറ്റുകളും കേന്ദ്രീകരിച്ച് മലയോര മേഖലയിൽ വ്യാജമദ്യ നിർമാണ സംഘങ്ങൾ സജീവമാകുന്നു. ആന, കാട്ടുപോത്ത് ,പുലി തുടങ്ങിയ മൃഗങ്ങളുടെ സാന്നിധ്യം പകൽസമയങ്ങളിൽ പോലും ആളുകളെ ഈ മേഖലകളിൽ നിന്ന് അകറ്റി നിർത്തുന്നതാണ് വാറ്റുസംഘങ്ങൾക്ക് ഗുണകരമാകുന്നത്.

താവളമാകുന്നത് വനാതിർത്തികൾ

വാഹനങ്ങൾക്കോ ഉദ്യോഗസ്ഥർക്കോ പെട്ടെന്ന് എത്തിപ്പെടാൻ കഴിയാത്ത കോരുത്തോട്,കൊമ്പുകുത്തി, മതമ്പ, കുപ്പക്കയം, ചെന്നാപ്പാറ തുടങ്ങിയ പ്രദേശങ്ങളാണ് വ്യാജമദ്യ നിർമാണത്തിന്റെ പ്രധാന കേന്ദ്രങ്ങൾ. കാടുപിടിച്ചു കിടക്കുന്ന എസ്റ്റേറ്റുകളും തകർന്നു കിടക്കുന്ന റോഡുകളും ഇവർക്ക് സുരക്ഷിത താവളമൊരുക്കുന്നു. വലിയ വീപ്പകളിൽ ‘കോട’ കലക്കി കാടിനുള്ളിൽ ഒളിപ്പിച്ചുവെച്ച് 10 ദിവസത്തിന് ശേഷം രാത്രികാലങ്ങളിലാണ് ചാരായം വാറ്റിയെടുക്കുന്നത്.

വിപണനവും സുരക്ഷാ രീതികളും

ഗുണനിലവാരമനുസരിച്ച് ലിറ്ററിന് 800 രൂപ മുതൽ 1500 രൂപ വരെ ഈടാക്കിയാണ് വിൽപന. പിടിക്കപ്പെടാതിരിക്കാൻ വൻ സുരക്ഷാ സംവിധാനങ്ങളാണ് ഇവർ ഒരുക്കുന്നത്:

• നിരീക്ഷണം: രാത്രി വാറ്റ് നടക്കുന്ന സമയത്ത് വഴികളിലെല്ലാം കാവൽക്കാരെ നിർത്തി സുരക്ഷ ഉറപ്പാക്കും.

• രക്ഷപ്പെടൽ: വാഹനം വരുന്ന ശബ്ദം കേട്ടാൽ ഉടൻ വനത്തിനുള്ളിലേക്ക് ഓടി രക്ഷപ്പെടും.

• ഹോം ഡെലിവറി: വിവാഹം തുടങ്ങിയ ചടങ്ങുകൾക്ക് ഓർഡർ അനുസരിച്ച് മദ്യം വീട്ടിലെത്തിച്ചു നൽകുന്ന മാഫിയകളും ഈ മേഖലയിലുണ്ട്. മുൻകൂട്ടി അറിയിച്ചാൽ കുറഞ്ഞ ചെലവിൽ മദ്യം എത്തിച്ചു നൽകുന്നതാണ് ഇവരുടെ രീതി.

വനാതിർത്തികൾക്ക് പുറമെ, പ്രളയത്തെത്തുടർന്ന് കൂട്ടിക്കൽ പഞ്ചായത്തിൽ ആളുകൾ ഒഴിഞ്ഞുപോയ വീടുകളും ഇത്തരക്കാർ താവളമാക്കുന്നുണ്ടെന്ന് വിവരമുണ്ട്.

വാറ്റ് ചാരായം നിർമിക്കാൻ ആവശ്യമായ കോട വലിയ വീപ്പകളിൽ കലക്കി കാടിനുള്ളിൽ സൂക്ഷിക്കും. 10ൽ അധികം ദിവസങ്ങളുടെ കാത്തിരിപ്പിന് ശേഷം ഇത് സുരക്ഷിതമായ സ്ഥലത്ത് വച്ച് തന്നെ രാത്രി കാലങ്ങളിൽ വാറ്റി എടുക്കുകയാണ് പതിവ്.

തലയിൽ വാറ്റ് ഉപകരണങ്ങൾ ചുമന്ന് കൊണ്ട് വരുന്ന വാറ്റുകാരന്റെ പിന്നാലെ നടന്നെത്തുന്ന പൊലീസ്, എക്സൈസ് സംഘങ്ങളുടെ കാഴ്ച പണ്ട് മലയോര മേഖലയിൽ കൂടുതലായിരുന്നു. എന്നാൽ, ഇപ്പോൾ പ്രതികൾ പിടിയിലാകാത്തതിന്റെ കാരണം വലിയ സുരക്ഷയിൽ തന്നെ ഇവർ വാറ്റ് കേന്ദ്രങ്ങൾ നടത്തുന്നു എന്നതിനാലാണ്.