തിരക്കിനിടെ തളർന്നുവീണ കുഞ്ഞിന് തണലായി വനിതാ എസ്.ഐ; യൂണിഫോമിനുള്ളിലെ അമ്മമനസ്സ് ശാന്തി കെ. ബാബു

എരുമേലി: മണ്ഡലകാല തീർത്ഥാടനത്തിന്റെ തിരക്കേറിയ എരുമേലി ടൗണിൽ ഭക്തർക്കും നാട്ടുകാർക്കും ഒരുപോലെ ആശ്വാസമായി മാറിയിരിക്കുകയാണ് എസ്.ഐ ശാന്തി കെ. ബാബു. അന്യസംസ്ഥാനത്തുനിന്നും എത്തിയ തീർത്ഥാടക സംഘത്തിലെ കുഞ്ഞിനാണ് തിരക്കിനിടയിൽ പെട്ട് ദേഹാസ്വാസ്ഥ്യം അനുഭവപ്പെട്ടത്.

മണ്ഡല മകരവിളക്ക് പ്രമാണിച്ച് എരുമേലിയിൽ വൻ ഭക്തജനത്തിരക്കാണ് അനുഭവപ്പെടുന്നത്. ഇതിനിടയിലാണ് കുഞ്ഞിന് അസ്വസ്ഥത അനുഭവപ്പെട്ടത്. കുഞ്ഞ് തളരുന്നത് ശ്രദ്ധയിൽപ്പെട്ട ശാന്തി കെ. ബാബു ഉടൻ തന്നെ കുഞ്ഞിനെ എടുക്കുകയും സുരക്ഷിതമായ സ്ഥലത്തേക്ക് മാറ്റുകയും ചെയ്തു. കുഞ്ഞിന് ആവശ്യമായ പ്രാഥമിക ശുശ്രൂഷകൾ നൽകുന്നതിനും കുഞ്ഞിനെ സമാധാനിപ്പിക്കുന്നതിനും അവർ മുൻകൈ എടുത്തു.

കോട്ടയം നാർക്കോട്ടിക് സെല്ലിൽ നിന്നുമാണ് ശാന്തി എരുമേലിയിൽ ഡ്യൂട്ടിക്കായി എത്തിയത്. ഡ്യൂട്ടി കൃത്യമായി നിർവഹിക്കുന്നതിനോടൊപ്പം തന്നെ സഹജീവികളോടുള്ള കരുണയും കരുതലും അവർ പ്രകടിപ്പിച്ചു. പോലീസ് യൂണിഫോമിനുള്ളിലെ അമ്മമനസ്സിനെ സോഷ്യൽ മീഡിയയിലൂടെയും മറ്റും നിരവധി പേരാണ് ഇപ്പോൾ അഭിനന്ദിക്കുന്നത്.

“തിരക്കിനിടയിൽ കുഞ്ഞ് വല്ലാതെ തളർന്നിരുന്നു. ആ സമയത്ത് ഒരു പോലീസ് ഉദ്യോഗസ്ഥ എന്നതിലുപരി ഒരു അമ്മ എന്ന നിലയിലാണ് താൻ പ്രവർത്തിച്ചത്.” – ശാന്തി കെ. ബാബു