ബോയിസ് ശ്രീസുബ്രഹ്മണ്യ സ്വാമി ക്ഷേത്രത്തിൽ തൈപ്പൂയ മഹോത്സവം ജനുവരി 28 മുതൽ; ഒരുക്കങ്ങൾ പൂർത്തിയായി

ഭക്തജനങ്ങളുടെ ആശ്രിതവത്സലനും അഭിഷ്ടവരദായകനുമായ ശ്രീ സുബ്രഹ്മണ്യ സ്വാമി കുടികൊള്ളുന്ന പുണ്യക്ഷേത്രത്തിൽ ഈ വർഷത്തെ തൈപ്പൂയ മഹോത്സവം ജനുവരി 28 മുതൽ ഫെബ്രുവരി 1 വരെ ഭക്തിസാന്ദ്രമായ ചടങ്ങുകളോടെ ആഘോഷിക്കും.

ഉത്തരായന കാലത്തിലെ രോഹിണി നക്ഷത്രത്തിൽ, ജനുവരി 28 ബുധനാഴ്ച (മകരം 14) രാത്രി 7.30-നും 8.20-നും മദ്ധ്യേയുള്ള മിഥുനം രാശി മുഹൂർത്തത്തിൽ ക്ഷേത്രം തന്ത്രി ബ്രഹ്മശ്രീ പൂഞ്ഞാർ അജി നാരായണൻ തന്ത്രികളുടെ മുഖ്യകാർമ്മികത്വത്തിൽ ഉത്സവത്തിന് തൃക്കൊടിയേറും.

അഞ്ചുദിവസം നീണ്ടുനിൽക്കുന്ന ഉത്സവ ചടങ്ങുകൾ ഫെബ്രുവരി 1 ഞായറാഴ്ച (മകരം 18) നടക്കും. അന്നേ ദിവസം ഉച്ചയ്ക്ക് ശേഷം നടക്കുന്ന ആറാട്ട് കാവടി ഘോഷയാത്രയോടെ ഈ വർഷത്തെ ഉത്സവത്തിന് സമാപനമാകും. ഉത്സവത്തോടനുബന്ധിച്ച് വിശേഷാൽ പൂജകൾ, അന്നദാനം, വിവിധ കലാപരിപാടികൾ എന്നിവയും ക്ഷേത്രസന്നിധിയിൽ ഒരുക്കിയിട്ടുണ്ട്.

കഴിഞ്ഞ വർഷങ്ങളിലെ നിർമ്മാണ പ്രവർത്തനങ്ങളിലും ആഘോഷങ്ങളിലും അകമഴിഞ്ഞ സഹകരണം നൽകിയ എല്ലാ ഭക്തജനങ്ങളെയും ക്ഷേത്ര ഭാരവാഹികൾ നന്ദിയോടെ സ്മരിച്ചു. ഈ വർഷത്തെ തിരുവുത്സവത്തിലേക്കും എല്ലാ ഭക്തജനങ്ങളുടെയും സാന്നിദ്ധ്യവും സഹായസഹകരണങ്ങളും ഉണ്ടാകണമെന്ന് ദേവനാമത്തിൽ അഭ്യർത്ഥിക്കുന്നു.

ഭഗവാന്റെ അനുഗ്രഹത്തിനായി ഈ പുണ്യനാളുകളിൽ എല്ലാ ഭക്തരെയും ക്ഷേത്രസന്നിധിയിലേക്ക് സാദരം ക്ഷണിക്കുന്നതായി ആഘോഷക്കമ്മിറ്റി അറിയിച്ചു.