അമേരിക്കൻ വനപാത കീഴടക്കി മലയാളി; റെക്കോർഡ് നേട്ടവുമായി പൊൻകുന്നം സ്വദേശി ബ്രൂസ് തോമസ്

പൊൻകുന്നം: അമേരിക്കയിലെ അതിസാഹസികമായ വനപാതയിലൂടെ 3,500 കിലോമീറ്ററിലേറെ സഞ്ചരിച്ച് റെക്കോർഡ് കുറിച്ച ചിറക്കടവ് സ്വദേശി ബ്രൂസ് തോമസിന് ജന്മനാടിന്റെ ആദരം. ആപ്പലേഷ്യൻ ട്രെയിൽ (Appalachian Trail) എന്ന ദുർഘടമായ മലനിരകളിലൂടെയും വനങ്ങളിലൂടെയും ലക്ഷ്യത്തിലെത്തുന്ന ആദ്യ മലയാളി എന്ന ഖ്യാതിയാണ് ബ്രൂസ് സ്വന്തമാക്കിയത്. ചിറക്കടവ് പബ്ലിക് ലൈബ്രറിയുടെ ആഭിമുഖ്യത്തിൽ ഇദ്ദേഹത്തെ ആദരിച്ചു.

അമേരിക്കയിലെ 14 സംസ്ഥാനങ്ങളിലായി വ്യാപിച്ചുകിടക്കുന്ന ആപ്പലേഷ്യൻ ട്രെയിൽ പൂർത്തിയാക്കാൻ ബ്രൂസ് തോമസ് എടുത്തത് 153 ദിവസങ്ങളാണ്. കാനഡയിൽ ജോലി ചെയ്യുന്ന ബ്രൂസ്, മുൻപ് അവിടെയും ഹൈക്കിങ് നടത്തിയിട്ടുണ്ടെങ്കിലും ഇത്രയും ദൈർഘ്യമേറിയ യാത്ര ആദ്യമായാണ്. യാത്ര വിജയകരമായി പൂർത്തിയാക്കിയതിനെത്തുടർന്ന് ആപ്പലേഷ്യൻ ട്രെയിൽ കൺസർവൻസി അദ്ദേഹത്തിന് സർട്ടിഫിക്കറ്റ് നൽകി ആദരിച്ചു.

ഇന്ത്യയിലെ മറ്റ് സംസ്ഥാനങ്ങളിൽ നിന്നുള്ള ചിലർ മുൻപ് ഈ നേട്ടം കൈവരിച്ചിട്ടുണ്ടെങ്കിലും കേരളത്തിൽ നിന്നൊരാൾ ഈ പാത കീഴടക്കുന്നത് ഇതാദ്യമായാണ്. അവരേക്കാൾ കുറഞ്ഞ കാലയളവിൽ യാത്ര പൂർത്തിയാക്കി എന്നതാണ് ബ്രൂസിന്റെ നേട്ടത്തെ ശ്രദ്ധേയമാക്കുന്നത്.

ചിറക്കടവ് പബ്ലിക് ലൈബ്രറിയിൽ നടന്ന ചടങ്ങിൽ മെന്റലിസ്റ്റും ഹിപ്നോട്ടിസ്റ്റുമായ ഡോ. സജീവ് പള്ളത്ത് ബ്രൂസ് തോമസിന് ഉപഹാരം സമ്മാനിച്ചു. ചിറക്കടവ് പഞ്ചായത്ത് പ്രസിഡന്റ് ടി.എൻ. ഗിരീഷ് കുമാർ അധ്യക്ഷത വഹിച്ച ചടങ്ങ് ബ്ലോക്ക് പഞ്ചായത്ത് പ്രസിഡന്റ് ജയ ശ്രീധർ ഉദ്ഘാടനം ചെയ്തു.

ചടങ്ങിൽ ജില്ലാ പഞ്ചായത്ത് അംഗം അഭിലാഷ് ചന്ദ്രൻ, പഞ്ചായത്ത് അംഗങ്ങളായ ഉഷ ശ്രീകുമാർ, ലത ശ്രീകുമാർ, ഗൗതം ബാലചന്ദ്രൻ, കെ.കെ. സന്തോഷ് കുമാർ, എക്സൈസ് സർക്കിൾ ഇൻസ്പെക്ടർ കെ.ബി. ബിന്ദു, ബേബിച്ചൻ ഏർത്തയിൽ, ശ്രീജ അജിത്ത് തുടങ്ങിയവർ സംസാരിച്ചു. ലൈബ്രറി സെക്രട്ടറി രാജേഷ് കുമാർ പൊൻകുന്നം സ്വാഗതവും ജോർജ് തോമസ് നന്ദിയും പറഞ്ഞു.