ഹാ..കഷ്ടം ! ഏലപ്പാറ ജംക്‌ഷൻ കയ്യടക്കി കന്നുകാലികൾ; വഴി മാറി നടക്കേണ്ട ഗതികേടിൽ യാത്രക്കാർ

ഏലപ്പാറ∙ വാഹനങ്ങൾക്ക് തടസ്സമായി റോഡ് നിറഞ്ഞു കന്നുകാലികൾ. വഴി മാറി നടക്കേണ്ട ഗതികേടിൽ യാത്രക്കാർ. വിനോദസഞ്ചാരികൾ, വ്യാപാരികൾ ,കാൽനട യാത്രക്കാർ എന്നിവർക്കെല്ലാം ശല്യമായിട്ടാണ് ഏലപ്പാറ ജംക്‌ഷനിൽ കാലിക്കൂട്ടം. മേയാൻ അഴിച്ചു വിടുന്ന കാലികൾ റോഡ് കയ്യടക്കുന്നതിനൊപ്പം വിസർജ്യം നടത്തുകയും ചെയ്യുന്നു.

പകൽ കാലികൾ റോഡ് കയ്യടക്കി നടക്കുമ്പൾ രാത്രി ഇവ റോഡിൽ കിടന്നും അപകട സാധ്യത ഉയർത്തുന്നു. രാത്രി റോഡിൽ കിടക്കുന്ന കന്നുകാലികളിൽ തട്ടി ഇരുചക്ര വാഹന യാത്രക്കാർ വീഴുന്നുണ്ട്. ചാണകത്തിൽ ചവിട്ടി കാൽനടക്കാർ തെന്നി വീഴുന്ന സംഭവങ്ങൾ ഉണ്ടായിട്ടുണ്ട്. വ്യാപാര സ്ഥാപനങ്ങളുടെ മുന്നിൽ കാലികൾ കൂട്ടം കൂടി നിൽക്കുന്നതാണ് കച്ചവടക്കാരെ ബുദ്ധിമുട്ടിലാക്കുന്നത്.

പഞ്ചായത്ത് ഓഫിസ് കാര്യാലയത്തിന്റെ മുൻവശത്ത് പോലും കന്നുകാലിക്കൂട്ടം പതിവു കാഴ്ചയാണ്. എന്നാൽ നടപടികൾക്ക് പഞ്ചായത്ത് അധികൃതർ തയാറായിട്ടില്ല. റോഡിൽ അലഞ്ഞു നടക്കുന്ന കാലികളെ പിടിച്ചു കെട്ടണമെന്ന ആവശ്യവും നടപ്പാക്കാത്തതാണ് നിലവിലെ അവസ്ഥയ്ക്കു കാരണം.