മുണ്ടക്കയം പഞ്ചായത്ത് പുതിയ ഭരണസമിതി അറിയാൻ; മാലിന്യക്കൂമ്പാരമായി അമരാവതി – കരിനിലം റോഡ്: നിരീക്ഷണ ക്യാമറകൾ സ്ഥാപിക്കണമെന്ന ആവശ്യം ശക്തമാകുന്നു

മുണ്ടക്കയം: അമരാവതി മുതൽ കരിനിലം ജംഗ്ഷൻ വരെയുള്ള റോഡരികുകൾ സാമൂഹ്യവിരുദ്ധർ മാലിന്യം തള്ളുന്ന കേന്ദ്രമായി മാറുന്നു. വഴിയോരങ്ങളിൽ മാലിന്യം കുന്നുകൂടുന്നത് മൂലം കാൽനടയാത്ര പോലും അസാധ്യമായ സാഹചര്യമാണ് നിലവിലുള്ളത്. ഈ വിഷയത്തിൽ അധികൃതർ അടിയന്തിരമായി ഇടപെടണമെന്ന ആവശ്യം ശക്തമാവുകയാണ്.

ചാക്കുകളിലും പ്ലാസ്റ്റിക് കവറുകളിലുമായി വൻതോതിൽ മാലിന്യമാണ് പാതയോരങ്ങളിൽ തള്ളുന്നത്. ഇത് മഴക്കാലം കൂടി എത്തുന്നതോടെ വലിയ ആരോഗ്യപ്രശ്നങ്ങൾക്ക് കാരണമായേക്കാം.റോഡരികിലെ ഈ മാലിന്യക്കൂമ്പാരങ്ങൾ തെരുവ് പട്ടികൾ താവളമാക്കിയിരിക്കുകയാണ്. ഇത് വഴി പോകുന്ന യാത്രക്കാർക്കും സ്കൂൾ കുട്ടികൾക്കും നേരെ തെരുവ് നായകളുടെ ആക്രമണം പതിവാകുന്നത് വലിയ ഭീതി പരത്തുന്നുണ്ട്.മാലിന്യത്തിന്റെ ദുർഗന്ധം കാരണം മൂക്ക് പൊത്തി നടക്കേണ്ട അവസ്ഥയിലാണ് നാട്ടുകാർ. റോഡിന്റെ വശങ്ങൾ മാലിന്യം കയ്യടക്കിയതോടെ നടപ്പാതകൾ ഇല്ലാതായിരിക്കുന്നു.

ക്യാമറ നിരീക്ഷണം: മാലിന്യം തള്ളുന്നവരെ പിടികൂടാൻ അമരാവതി മുതൽ കരിനിലം ജംഗ്ഷൻ വരെയുള്ള ഭാഗങ്ങളിൽ അടിയന്തിരമായി സിസിടിവി (CCTV) ക്യാമറകൾ സ്ഥാപിക്കണം.

കർശന നടപടി: പൊതുസ്ഥലത്ത് മാലിന്യം തള്ളുന്നവർക്കെതിരെ കനത്ത പിഴയും നിയമനടപടികളും സ്വീകരിക്കണം.

മാലിന്യ നിർമ്മാർജ്ജനം: നിലവിൽ കുന്നുകൂടി കിടക്കുന്ന മാലിന്യം അടിയന്തിരമായി നീക്കം ചെയ്ത് പ്രദേശം ശുചീകരിക്കാൻ പഞ്ചായത്ത് ഭരണകൂടം തയ്യാറാകണം.

ജനങ്ങളുടെ സ്വൈര്യജീവിതത്തിന് തടസ്സമാകുന്ന ഈ പ്രശ്നത്തിന് ശാശ്വത പരിഹാരം കാണണമെന്നാണ് നാട്ടുകാരുടെ പ്രധാന ആവശ്യം.