മുണ്ടക്കയം വണ്ടൻപതാൽ മൂന്നുസെന്റ് സമീപം ഓട്ടോറിക്ഷയിൽ പിക്കപ്പ് വാൻ ഇടിച്ചു: ഡ്രൈവർക്ക് പരിക്ക്, വാഹനം നിർത്താതെ പോയി

മുണ്ടക്കയം: വണ്ടൻപതാൽ മൂന്നുസെന്റ് കോളനിക്ക് സമീപം ഓട്ടോറിക്ഷയ്ക്ക് പിന്നിൽ പിക്കപ്പ് വാൻ ഇടിച്ച് ഡ്രൈവർക്ക് പരിക്ക്. മുണ്ടക്കയം ടൗണിലെ ഓട്ടോ ഡ്രൈവറായ വെട്ടുകല്ലാംകുഴി പുല്ലണി വീട്ടിൽ ഷിബു മോൻ പി.എസ്.-നാണ് പരിക്കേറ്റത്. ഇടിയുടെ ആഘാതത്തിൽ ഷിബുവിന്റെ കൈയ്ക്ക് പൊട്ടലുണ്ട്.

കഴിഞ്ഞ ഞായറാഴ്ച (ഏപ്രിൽ 19) രാവിലെയായിരുന്നു അപകടം. കോരുത്തോട് സവാരി കഴിഞ്ഞ് മടങ്ങുകയായിരുന്നു ഷിബുവിന്റെ ഓട്ടോറിക്ഷ. മുണ്ടക്കയം ഭാഗത്തുനിന്നും വന്ന KL 49 R 0223 നമ്പറുള്ള പിക്കപ്പ് വാൻ ഓട്ടോയുടെ പിന്നിൽ ഇടിച്ച ശേഷം നിർത്താതെ ഓടിച്ചുപോവുകയായിരുന്നു.

സംഭവത്തിൽ മുണ്ടക്കയം പോലീസ് കേസെടുത്ത് അന്വേഷണം ആരംഭിച്ചു. സിസിടിവി ദൃശ്യങ്ങൾ കേന്ദ്രീകരിച്ച് വാഹനവും ഡ്രൈവറെയും കണ്ടെത്താനുള്ള ശ്രമങ്ങൾ പുരോഗമിക്കുകയാണ്.