മുണ്ടക്കയത്ത് ബൈക്കിന് പിന്നിലിരുന്ന് യാത്ര ചെയ്യുന്നതിനിടെ റോഡിലേക്ക് തെറിച്ചു വീണ് വീട്ടമ്മ മരിച്ചു

ബൈക്കിന് പിന്നിലിരുന്ന് യാത്ര ചെയ്യുന്നതിനിടെ റോഡിലേക്ക് തെറിച്ചു വീണ് വീട്ടമ്മ മരിച്ചു. കോരുത്തോട് പഴനിലത്ത് വീട് ജോജി തോമസിന്റെ ഭാര്യ ജെസ്സി ജോജി (49) ആണ് മരിച്ചത്.

തിങ്കളാഴ്ച (12-01-2026) മുണ്ടക്കയം പോലീസ് സ്റ്റേഷൻ പരിധിയിലുള്ള പഴയ പനക്കച്ചിറ – പനക്കച്ചിറ റോഡിലായിരുന്നു അപകടം. ജെസ്സിയും ഭർത്താവ് ജോജി തോമസും (53) സഞ്ചരിച്ചിരുന്ന KL 34 1945 നമ്പറിലുള്ള മോട്ടോർസൈക്കിളിൽ നിന്നാണ് അപകടം സംഭവിച്ചത്.

ജോജി തോമസ് ഓടിച്ചിരുന്ന ബൈക്കിന് പിന്നിലിരുന്ന് യാത്ര ചെയ്യുകയായിരുന്നു ജെസ്സി. യാത്രയ്ക്കിടെ അപ്രതീക്ഷിതമായി ബൈക്കിന് പിന്നിൽ നിന്നും ജെസ്സി റോഡിലേക്ക് തെറിച്ചു വീഴുകയായിരുന്നു. ഗുരുതരമായി പരിക്കേറ്റ ഇവരെ ഉടൻ തന്നെ മുണ്ടക്കയം മെഡിക്കൽ ട്രസ്റ്റ് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. മൃതദേഹം ആശുപത്രി മോർച്ചറിയിൽ സൂക്ഷിച്ചിരിക്കുകയാണ്. സംഭവത്തിൽ മുണ്ടക്കയം പോലീസ് മേൽനടപടികൾ സ്വീകരിച്ചു വരുന്നു.