കൂട്ടിക്കലിന് ആവേശമായ് വനിതാ കലോത്സവം

കൂട്ടിക്കൽ : കൂട്ടിക്കൽ ഗ്രാമപഞ്ചായത്തിന്റെ വാർഷിക പദ്ധതിയിൽ ഉൾപ്പെടുത്തി നടപ്പിലാക്കിയ വനിതാ കലോത്സവം നാടിന് ആവേശമായ് മാറി. പഞ്ചായത്തിന്റെ വിവിധ വാർഡുകളിൽ നിന്നായി നൂറുകണക്കിന് വനിതകളാണ് തങ്ങളുടെ കഴിവുകൾ മാറ്റുരയ്ക്കാൻ അരങ്ങിന് എത്തിയത്. കൂട്ടിക്കൽ സെന്റ് മേരീസ് ഓഡിറ്റോറിയത്തിൽ വച്ചുനടന്ന കലോത്സവത്തിന് പഞ്ചായത്ത് പ്രസിഡന്റ് ബിജോയ് ജോസ് മുണ്ടുപാലം അദ്ധ്യക്ഷത വഹിച്ചു. കോട്ടയം ജില്ലാ പഞ്ചായത്ത് പ്രസിഡന്റ് ശ്രീമതി ഹേമലതാ പ്രേംസാഗർ കലോത്സവം ഉത്ഘാടനം ചെയ്തു. നവകേരള സൃഷ്ടിക്കുവേണ്ടിയുള്ള പ്രയാണത്തിൽ സ്ത്രീകൾ വഹിക്കുന്ന പങ്ക് നിർണ്ണായകമാണെന്നും കുടുംബശ്രീ ഉൾപ്പെടെയുള്ള സ്ത്രീ ശാക്തീകരണ പ്രസ്ഥാനങ്ങൾ സമൂഹത്തിൽ നടത്തുന്ന പ്രവർത്തനങ്ങൾ മാതൃകാപരമാണെന്നും ഉത്ഘാടന പ്രസംഗത്തിൽ ജില്ലാപഞ്ചായത്ത് പ്രസിഡന്റ് പറഞ്ഞു.
സമ്മേളനത്തിൽ ഗ്രാമപഞ്ചായത്ത് വൈസ് പ്രസിഡന്റ് രജനി സുധീർ,  പഞ്ചായത്ത് സ്റ്റാന്റിംഗ് കമ്മിറ്റി ചെയർമാൻമാരായ പി എസ് സജിമോൻ, ജെസ്സി ജോസ്, വിനോദ് കെ എൻ അംഗങ്ങളായ ജേക്കബ് ചാക്കോ, എം വി ഹരിഹരൻ, രജനി സലിലൻ, സിന്ധു മുരളീധരൻ, ആന്‍സി അഗസ്റ്റിൻ, മായ റ്റി എൻ, സൌമ്യ ഷെമീർ, കെ എസ് മോഹനൻ, സി.ഡി.എസ്. ചെയർപേഴ്സൺ ആശാബിജു, ഐ.സി.ഡി.എസ് സൂപ്പർവൈസർ സിന്ധു എസ് തുടങ്ങിയവർ സംസാരിച്ചു.
സമാപന സമ്മേളനവും വിശിഷ്ടവ്യക്തികളെ ആദരിക്കലും അഡ്വ.സെബാസ്റ്റ്യൻ കുളത്തുങ്കൽ ഉദ്ഘാടനം ചെയതു. കലോത്സവത്തിൽ വിജയികളായവർക്കുള്ള സമ്മാനദാനവും അദ്ദേഹം നിർവഹിച്ചു. കലോത്സവത്തിന് മുന്നോടിയായി നൂറുകണക്കിന് വനിതകൾ പങ്കെടുത്ത റാലിയും കൂട്ടിക്കൽ ടൌണിൽ നടന്നു.