മുണ്ടക്കയം കോരുത്തോട് റോഡിൽ പനക്കച്ചിറ ഭാഗത്ത് എതിരെ വന്ന വാഹനത്തിന് സൈഡ് കൊടുക്കുന്നതിനിടെ നിയന്ത്രണം തെറ്റി; പനയ്ക്കച്ചിറയിൽ കാർ മരത്തിലിടിച്ചു അപകടം

മുണ്ടക്കയം: ശബരിമല ദർശനം കഴിഞ്ഞ് മടങ്ങിയ തമിഴ്‌നാട് സ്വദേശികളായ തീർത്ഥാടകർ സഞ്ചരിച്ച കാർ നിയന്ത്രണം വിട്ട് മരത്തിലിടിച്ചു. മുണ്ടക്കയത്തിന് സമീപം പഴയ പനയ്ക്കച്ചിറ വനഭാഗത്ത് വെച്ചായിരുന്നു അപകടം. കാറിലുണ്ടായിരുന്ന അഞ്ചുപേർക്ക് പരിക്കേറ്റു.

ഈറോഡ് ശാസ്ത്രി നഗർ തിരുവള്ളൂർ സ്ട്രീറ്റിൽ താമസിക്കുന്ന മണികണ്ഠൻ (ഡ്രൈവർ), രാജ, കണ്ണൻ, വിദുൽ, ബാലമുരുകൻ എന്നിവർക്കാണ് പരിക്കേറ്റത്. ഇവരെ മുണ്ടക്കയം മെഡിക്കൽ ട്രസ്റ്റ് (MMT) ആശുപത്രിയിൽ പ്രവേശിപ്പിച്ചു. ആരുടെയും പരിക്ക് ഗുരുതരമല്ലെന്നാണ് പ്രാഥമിക വിവരം.

തീർത്ഥാടകർ സഞ്ചരിച്ചിരുന്ന TN 33 BM 1204 നമ്പറിലുള്ള ഇന്നോവ കാർ, പനയ്ക്കച്ചിറ വനഭാഗത്തെ റോഡിലൂടെ വരുമ്പോൾ എതിരെ വന്ന മറ്റൊരു വാഹനത്തിന് സൈഡ് കൊടുക്കുന്നതിനിടെ നിയന്ത്രണം നഷ്ടപ്പെടുകയായിരുന്നു. റോഡരികിലെ തേക്കുമരത്തിൽ കാർ ഇടിച്ചാണ് അപകടമുണ്ടായത്. നാട്ടുകാരും വിവരമറിഞ്ഞെത്തിയ പോലീസും ചേർന്നാണ് പരിക്കേറ്റവരെ ആശുപത്രിയിൽ എത്തിച്ചത്.