സൗജന്യ യാത്രയുമായി കാഞ്ഞിരപ്പള്ളിയിലെ ‘മാതൃകാ ഓട്ടോക്കാരൻ’; പ്രിയദർശിനി പദ്ധതിക്ക് മാതൃകയായി അൻവർ

കാഞ്ഞിരപ്പള്ളി: സാമൂഹിക സേവന രംഗത്ത് വ്യത്യസ്തമായൊരു ചുവടുവെപ്പുമായി കാഞ്ഞിരപ്പള്ളി പട്ടിമറ്റം സ്വദേശി ചേലയിൽ അൻവർ. തൻ്റെ ഓട്ടോറിക്ഷയിൽ യാത്ര ചെയ്യുന്നവർക്ക് സൗജന്യ യാത്രയൊരുക്കി നാടിന് മാതൃകയാവുകയാണ് ഈ ഓട്ടോ തൊഴിലാളി. പ്രിയദർശിനി പദ്ധതിയിൽ നിന്ന് പ്രചോദനമുൾക്കൊണ്ടാണ് അൻവർ ഇത്തരമൊരു തീരുമാനമെടുത്തത്.
തൻ്റെ ഓട്ടോയിൽ ഓട്ടം പോയി തിരികെ വരുമ്പോൾ (റീടേൺ ട്രിപ്പ്) യാത്രാമധ്യേ കയറുന്നവർക്കാണ് അൻവർ സൗജന്യ യാത്ര വാഗ്ദാനം ചെയ്യുന്നത്. സ്ത്രീകൾക്ക് മാത്രമായി പരിമിതപ്പെടുത്താതെ, പുരുഷന്മാർക്കും ഈ സൗജന്യ സേവനം ലഭ്യമാണ് എന്നതാണ് ഇതിൻ്റെ പ്രത്യേകത.
കടുത്ത കോൺഗ്രസ് അനുഭാവിയായ അൻവർ, പ്രിയദർശിനി പദ്ധതിയുടെ ആശയങ്ങൾ ഉൾക്കൊണ്ടുകൊണ്ടാണ് ഇത്തരമൊരു മാതൃകാപരമായ സേവനത്തിന് തുടക്കം കുറിച്ചത്. ഓട്ടോറിക്ഷാ തൊഴിലാളികൾക്കിടയിൽ നിന്നുയരുന്ന ഇത്തരം സേവന മനോഭാവം നാട്ടുകാർക്കിടയിൽ വലിയ പ്രശംസയാണ് നേടിക്കൊടുക്കുന്നത്. കാഞ്ഞിരപ്പള്ളിയുടെ തിരക്കേറിയ നിരത്തുകളിൽ ഓടുമ്പോഴും, ലാഭത്തേക്കാൾ ഉപരിയായി തൻ്റെ സഹജീവികളെ സഹായിക്കുക എന്ന ലക്ഷ്യമാണ് അൻവറിനുള്ളത്.