പല തവണ റോഡിലൂടെ കടന്നുപോയ മറ്റ് വാഹനങ്ങൾക്ക് മുന്നിലും ചാടാൻ ശ്രമിച്ചിരുന്നതായി നാട്ടുകാർ, പൊൻകുന്നത്ത് കെഎസ്ആർടിസി ബസ് തലയിലൂടെ കയറിയിറങ്ങി യുവാവിന് ദാരുണാന്ത്യം!

പൊൻകുന്നം: കെ.കെ റോഡിൽ പൊൻകുന്നം 19-ാം മൈലിൽ കടുക്കാമല വളവിന് സമീപം കെ.എസ്.ആർ.ടി.സി ബസിന് മുന്നിലേക്ക് ചാടിയ യുവാവിന് ദാരുണാന്ത്യം. അപകടത്തിൽ കോട്ടയം ആർപ്പൂക്കര സ്വദേശി ടി.എസ്. രാജേഷ് (സൂചന) ആണ് മരിച്ചത്. ഇയാളുടെ പക്കൽ നിന്നും ലഭിച്ച തിരിച്ചറിയൽ രേഖകളിൽ നിന്നാണ് മരിച്ചയാളെക്കുറിച്ചുള്ള പ്രാഥമിക വിവരങ്ങൾ പോലീസിന് ലഭ്യമായത്.

കോട്ടയത്തുനിന്നും കുമളിക്ക് പോവുകയായിരുന്ന കെ.എസ്.ആർ.ടി.സി ഓർഡിനറി പ്രിയദർശിനി ബസിന് മുന്നിലേക്കാണ് യുവാവ് പെട്ടെന്ന് ചാടിയത്. പൊൻകുന്നം ഭാഗത്തുനിന്നും കെ.കെ റോഡിലൂടെ നടന്നു വന്ന ഇയാൾ, ഇതിനു മുൻപും പല തവണ റോഡിലൂടെ കടന്നുപോയ മറ്റ് വാഹനങ്ങൾക്ക് മുന്നിലും ചാടാൻ ശ്രമിച്ചിരുന്നതായി നാട്ടുകാർ കേരള ടുഡേ ന്യൂസിനോട് പറഞ്ഞു. ഇതിനുശേഷമാണ് കുമളി ഭാഗത്തേക്ക് പോയ ബസിന് മുന്നിലേക്ക് ഇയാൾ ചാടിയത്.