മുണ്ടക്കയം ഹോളി ട്രിനിറ്റി പള്ളി ഭവനപദ്ധതി സമർപ്പണം നാളെ; 8 കുടുംബങ്ങൾക്ക് ഇനി സ്വന്തം വീട്

മുണ്ടക്കയം: സി.എസ്.ഐ മധ്യകേരള മഹായിടവകയിലെ മുണ്ടക്കയം ഹോളി ട്രിനിറ്റി പള്ളിയുടെ 175-ാം വാർഷികാഘോഷങ്ങളുടെ ഭാഗമായി നിർമ്മിച്ച ഭവനപദ്ധതിയുടെ സമർപ്പണം നാളെ നടക്കും. ‘ഹെൻറി ബേക്കർ ജൂനിയർ ഹെറിറ്റേജ് സെന്റർ ആൻഡ് ജോർജ് വില്യംസ് റസിഡൻസി’ എന്ന് നാമകരണം ചെയ്തിരിക്കുന്ന ഈ പദ്ധതിയിലൂടെ എട്ട് ഭവനരഹിതരായ കുടുംബങ്ങൾക്കാണ് വീട് ലഭിക്കുന്നത്.

മുണ്ടക്കയത്തെ വനമേഖലകളിൽ ആദ്യമായി മിഷനറി പ്രവർത്തനം നടത്തിയ ഹെൻറി ബേക്കറിനോടുള്ള ആദരസൂചകമായാണ് പദ്ധതിക്ക് അദ്ദേഹത്തിന്റെ പേര് നൽകിയിരിക്കുന്നത്. നിർമ്മിക്കപ്പെട്ട എട്ട് വീടുകൾക്കും ഹെൻറി ബേക്കറിന്റെ കുടുംബാംഗങ്ങളുടെ പേരുകളാണ് നൽകിയിട്ടുള്ളതെന്ന് ജൂബിലി കൺവീനർ ബോബിന മാത്യു, സെക്രട്ടറി ആശാ ബിനു, പ്രോജക്ട് കൺവീനർ ജേക്കബ് പി. ജോൺ എന്നിവർ അറിയിച്ചു.

കാരുണ്യപ്രവർത്തനത്തിന്റെയും മിഷനറി പാരമ്പര്യത്തിന്റെയും തുടർച്ചയായി ഈ ഭവനപദ്ധതി മാറുമെന്ന് പള്ളി അധികൃതർ വ്യക്തമാക്കി.