ഭൂജല വകുപ്പിൽ നിന്നും 2 കുടിവെള്ള പദ്ധതികൾക്കായി 10 ലക്ഷം രൂപയുടെ ഭരണാനുമതി

മുണ്ടക്കയം : പൂഞ്ഞാർ നിയോജകമണ്ഡലത്തിലെ രണ്ട് കുടിവെള്ള പദ്ധതികൾക്കായി സംസ്ഥാന ഭൂജല വകുപ്പ് മുഖേന ഭരണാനുമതി ലഭിച്ചതായി അഡ്വ. സെബാസ്റ്റ്യൻ കുളത്തുങ്കൽ എംഎൽഎ അറിയിച്ചു. കുഴൽ കിണറുകൾ നിർമ്മിച്ച് അവയിൽ നിന്നുള്ള ജലം ഉപയോഗപ്പെടുത്തി പമ്പ് ഹൗസുകളും, മോട്ടോറുകളും സ്ഥാപിച്ച ഓവർഹെഡ് ടാങ്കുകളിലേക്ക് വെള്ളം പമ്പ് ചെയ്ത് ജലവിതരണത്തിനാണ് പദ്ധതി ആവിഷ്കരിച്ചിട്ടുള്ളത്. ഇത് പ്രകാരം മുണ്ടക്കയം ഗ്രാമപഞ്ചായത്തിലെ മുരിക്കും വയൽ ഗവൺമെന്റ് ഹയർസെക്കൻഡറി സ്കൂളിന്റെ ആവശ്യത്തിനായി ശുദ്ധജല ലഭ്യതയ്ക്കായി എസ്റ്റിമേറ്റ് പ്രകാരം 4.49 ലക്ഷം രൂപയുടെ പദ്ധതിക്കാണ് ഭരണാനുമതി ലഭ്യമായിട്ടുള്ളത്. ഇതോടൊപ്പം കൂട്ടിക്കൽ ഗ്രാമപഞ്ചായത്ത് ഒന്നാം വാർഡിലെ പറത്താനത്ത് ശ്രീദുർഗ്ഗാദേവി ക്ഷേത്രം ഭാഗത്ത് ക്ഷേത്രാവശ്യത്തിനും, പ്രദേശവാസികളുടെ കുടിവെള്ള ആവശ്യത്തിനുമായി എസ്റ്റിമേറ്റ് പ്രകാരം 5.61 ലക്ഷം രൂപയുടെയും പദ്ധതിക്കുമാണ് ഭരണാനുമതി ലഭ്യമായിട്ടുള്ളത്. പരമാവധി വേഗത്തിൽ ടെൻഡർ ക്ഷണിച്ച് പ്രവർത്തി നടത്തി പദ്ധതി നടപ്പിൽ വരുത്തി കുടിവെള്ള വിതരണം ആരംഭിക്കുമെന്നും എംഎൽഎ അറിയിച്ചു.