നായാട്ടിനിടെ അബദ്ധത്തിൽ തോക്ക് പൊട്ടി ഉഴവൂരിൽ അഭിഭാഷകൻ മരിച്ചു.

നായാട്ടിനിടെ അബദ്ധത്തിൽ തോക്ക് പൊട്ടി ഉഴവൂരിൽ അഭിഭാഷകൻ മരിച്ചു. ഉഴവൂർ നാലാം വാർഡിൽ ഒക്കാട്ട് വീട്ടിൽ അഡ്വ. ജോബി ജോസഫ് (56) ആണ് മരിച്ചത്. ഇന്ന് (ജനുവരി 12, തിങ്കൾ) രാത്രി പത്ത് മണിയോടെ ഉഴവൂർ മേലരീക്കര നീരുട്ടി ഭാഗത്തായിരുന്നു അപകടം.

തന്റെ കൈവശമുണ്ടായിരുന്ന തോക്കുമായി ടൂവീലറിൽ നായാട്ടിനായി പോയതായിരുന്നു ജോബി. യാത്രാമധ്യേ മുടന്തനാനിക്കൽ പ്രിൻസിന്റെ വീടിന് സമീപം വെച്ച് അബദ്ധത്തിൽ തോക്ക് പൊട്ടി ഇദ്ദേഹത്തിന് പരിക്കേൽക്കുകയായിരുന്നു. പെടലിയിലും ഇടത് ചെവിയുടെ ഭാഗത്തുമാണ് മാരകമായി മുറിവേറ്റത്.

വെടിയൊച്ച കേട്ട് ഓടിയെത്തിയ അയൽവാസി സേതുമാധവൻ (വല്യാട്ടുകുന്നേൽ) ആണ് ജോബി വാഹനം മറിഞ്ഞ് രക്തത്തിൽ കുളിച്ചു കിടക്കുന്നത് കണ്ടത്. ഉടൻ തന്നെ വിവരം പോലീസിനെ അറിയിച്ചു. ജോബി ജോസഫ് സംഭവസ്ഥലത്തുതന്നെ മരണപ്പെട്ടു.

നിലവിൽ മൃതദേഹം സംഭവസ്ഥലത്ത് പോലീസ് കാവലിലാണ്. കുറവിലങ്ങാട് പോലീസ് സ്ഥലത്തെത്തി ഇൻക്വസ്റ്റ് നടപടികൾ ആരംഭിച്ചു. തുടർ നടപടികൾക്ക് ശേഷം മൃതദേഹം പോസ്റ്റ്മോർട്ടത്തിനായി മാറ്റും.