ബ്രോക്കർ കോഡ് നൽകാമെന്ന് പറഞ്ഞ് ആധാർ വാങ്ങി; മുണ്ടക്കയം സ്വദേശിയെ അറിയാത്ത ആളുടെ കാർ ലോണിന് ജാമ്യക്കാരനാക്കി മുണ്ടക്കയം പൈങ്ങനയിൽ പ്രവർത്തിക്കുന്ന സ്വകാര്യ പണമിടപാട് സ്ഥാപനത്തിന്റെ വൻ തട്ടിപ്പ്; വായ്പ മുടങ്ങിയാൽ ഗുണ്ടാപ്പിരിവ്, സ്ഥാപനത്തിലെ ജീവനക്കാർക്ക് പൂർണ്ണ ഒത്താശ ചെയ്തുകൊടുക്കുന്നത് ബ്രാഞ്ച് മാനേജറാർ

മുണ്ടക്കയം: ബ്രോക്കർ കോഡ് നൽകാമെന്ന് വിശ്വസിപ്പിച്ച് ആധാർ കാർഡ് കൈക്കലാക്കിയ ശേഷം, മുൻപരിചയം പോലുമില്ലാത്ത വ്യക്തിയുടെ കാർ ലോണിന് ജാമ്യക്കാരനാക്കി സ്വകാര്യ പണമിടപാട് സ്ഥാപനത്തിന്റെ വൻ തട്ടിപ്പ്. പൈങ്ങനയിൽ പ്രവർത്തിക്കുന്ന ഒരു പ്രമുഖ സ്വകാര്യ വാഹന ലോൺ കമ്പനിക്കെതിരെയാണ് ഗുരുതരമായ സാമ്പത്തിക തട്ടിപ്പ് ആരോപണം ഉയർന്നിരിക്കുന്നത്. സംഭവത്തിൽ ഇരയായ മുണ്ടക്കയം സ്വദേശി ബാങ്കിംഗ് ഓംബുഡ്‌സ്മാന് പരാതി നൽകി.

തട്ടിപ്പിന്റെ രീതി:

ബ്രോക്കർ കോഡ് ഉണ്ടാക്കി നൽകാമെന്ന് പറഞ്ഞാണ് സ്ഥാപനത്തിലെ ജീവനക്കാർ മുണ്ടക്കയം സ്വദേശിയിൽ നിന്നും ആധാർ കാർഡും മറ്റ് വിവരങ്ങളും ശേഖരിച്ചത്. എന്നാൽ പിന്നീട് ഈ രേഖകൾ ദുരുപയോഗം ചെയ്യുകയായിരുന്നു. താൻ ജീവിതത്തിൽ നേരിട്ട് കണ്ടിട്ടുപോലുമില്ലാത്ത, യാതൊരു മുൻപരിചയവുമില്ലാത്ത ഒരു പെരുവന്താനം സ്വദേശിയെടുത്ത കാർ ലോണിനാണ് തന്റെ പേരിൽ ഇവർ വ്യാജമായി ഗ്യാരന്റി നിന്നിരിക്കുന്നത് എന്ന് മുണ്ടക്കയം സ്വദേശി വളരെ വൈകിയാണ് അറിയുന്നത്.

മാനേജറുടെ ധിക്കാരം:

സ്ഥാപനത്തിലെ ജീവനക്കാർക്ക് പൂർണ്ണ ഒത്താശ ചെയ്തുകൊടുക്കുന്നത് ബ്രാഞ്ച് മാനേജറാണെന്നാണ് പ്രധാന ആരോപണം. തട്ടിപ്പ് മനസ്സിലാക്കി പരാതി പറയാൻ ചെന്ന മുണ്ടക്കയം സ്വദേശിയോട് മാനേജർ തികച്ചും ധിക്കാരപരമായാണ് പെരുമാറിയത്. പോലീസിൽ പരാതി നൽകുമെന്ന് പറഞ്ഞപ്പോൾ, “പോയി പണി നോക്കാൻ” ആയിരുന്നു മാനേജറുടെ മറുപടി. കേസ് കോടതിയിൽ വന്നാൽ അത് കമ്പനി നോക്കിക്കൊള്ളുമെന്നും, തങ്ങൾക്ക് യാതൊരു ഭയവുമില്ലെന്നുമുള്ള രീതിയിലാണ് ഇയാൾ സംസാരിച്ചത്.

വായ്പ മുടങ്ങിയാൽ ഗുണ്ടാപ്പിരിവ്:

വളരെ മോശമായ രീതിയിലാണ് ഈ സ്ഥാപനത്തിന്റെ പ്രവർത്തനമെന്ന് നാട്ടുകാരും ആരോപിക്കുന്നു. വായ്പയുടെ ഒരു തവണ മുടങ്ങിയാൽ പോലും കളക്ഷൻ എക്സിക്യൂട്ടീവുകൾ ഗുണ്ടകളെപ്പോലെയാണ് ഇടപാടുകാരോട് പെരുമാറുന്നത്. ഇത്തരം ഭീഷണികളിലൂടെയും ചതിയിലൂടെയുമാണ് കമ്പനി തങ്ങളുടെ ബിസിനസ്സ് നടത്തിക്കൊണ്ടുപോകുന്നത്.

തുടർ നടപടികൾ:

സ്ഥാപനത്തിന്റെ കൊടിയ വഞ്ചനയ്ക്കും മാനേജറുടെ ഭീഷണിക്കുമെതിരെ മുണ്ടക്കയം സ്വദേശി ഇപ്പോൾ ഓംബുഡ്‌സ്മാനെ സമീപിച്ചിരിക്കുകയാണ്. സമാനമായ രീതിയിൽ കൂടുതൽ പേർ ഈ സ്ഥാപനത്തിന്റെ തട്ടിപ്പിന് ഇരയായിട്ടുണ്ടോ എന്നും സംശയിക്കപ്പെടുന്നുണ്ട്. സമഗ്രമായ അന്വേഷണം നടത്തി കുറ്റക്കാർക്കെതിരെ കർശന നടപടി സ്വീകരിക്കണമെന്നാണ് നാട്ടുകാരുടെ ആവശ്യം.