കുട്ടിക്കാനം ഇറക്കത്തിൽ കെഎസ്ആർടിസി ബസിന്റെ ബ്രേക്ക് പോയി; ഡ്രൈവറുടെ മനസാന്നിധ്യത്തിൽ ഒഴിവായത് വൻ ദുരന്തം

ഇടുക്കി: കുട്ടിക്കാനം വളഞ്ഞാംങ്ങാനത്ത് കെഎസ്ആർടിസി സൂപ്പർ ഫാസ്റ്റ് ബസ് അപകടത്തിൽപ്പെട്ടു. ഇറക്കത്തിൽ വച്ച് ബസിന്റെ ബ്രേക്ക് നഷ്ടപ്പെട്ടെങ്കിലും, ഡ്രൈവറുടെ അവസരോചിതമായ ഇടപെടൽ മൂലം വലിയൊരു ദുരന്തം ഒഴിവായി. നിയന്ത്രണം വിട്ട ബസ് റോഡരികിലെ തിട്ടയിലേക്ക് ഇടിച്ച് നിർത്തുകയായിരുന്നു.

വളഞ്ഞാംങ്ങാനത്തെ കുത്തിറക്കത്തിൽ വച്ചാണ് ബസിന്റെ ബ്രേക്ക് പ്രവർത്തിക്കാതായത്. ബസ് കൊക്കയിലേക്ക് മറിയാനോ മറ്റ് വാഹനങ്ങളിൽ ഇടിക്കാനോ ഉള്ള സാധ്യത മുന്നിൽക്കണ്ട്, ഡ്രൈവർ മനസാന്നിധ്യം കൈവിടാതെ ബസ് റോഡരികിലെ മൺതിട്ടയിലേക്ക് ഇടിച്ച് കയറ്റുകയായിരുന്നു.

സംഭവസമയത്ത് ബസിൽ യാത്രക്കാർ ഉണ്ടായിരുന്നെങ്കിലും ആർക്കും പരിക്കുകളില്ല. ബസ് തിട്ടയിലേക്ക് ഇടിച്ചു കയറിയതോടെ മുൻഭാഗത്തിന് കേടുപാടുകൾ സംഭവിച്ചു. മറ്റൊരു വലിയ അപകടം ഒഴിവാക്കിയ ഡ്രൈവറെ യാത്രക്കാരും നാട്ടുകാരും അഭിനന്ദിച്ചു. പിന്നീട് യാത്രക്കാരെ മറ്റ് ബസുകളിലായി ലക്ഷ്യസ്ഥാനത്തേക്ക് അയച്ചു.