മുണ്ടക്കയത്ത് റേഷൻ അരി കഴുകിയപ്പോൾ നീല നിറം, പഞ്ചായത്ത് അധികൃതർക്ക് പരാതി നൽകി

മുണ്ടക്കയത്ത് റേഷൻ അരി കഴുകിയപ്പോൾ വെള്ളത്തിന് നീലനിറം: അരി ഭക്ഷ്യയോഗ്യമല്ലെന്ന് അധികൃതർ

മുണ്ടക്കയം: ഏന്തയാറിൽ റേഷൻ കടയിൽ നിന്നും ലഭിച്ച അരി കഴുകിയപ്പോൾ വെള്ളത്തിന് നീലനിറം കണ്ടത് പ്രദേശവാസികളിൽ ആശങ്കയുണ്ടാക്കി. ഏന്തയാർ സ്വദേശിയായ ബിജുവിന് ലഭിച്ച റേഷൻ അരിയിലാണ് ഈ അസ്വാഭാവിക മാറ്റം കണ്ടെത്തിയത്.ഭക്ഷണം പാകം ചെയ്യുന്നതിനായി അരി കഴുകിയപ്പോഴാണ് വെള്ളത്തിന് കടും നീലനിറം കണ്ടത്. പലതവണ കഴുകി നോക്കിയെങ്കിലും നിറം മാറാതെ വന്നതോടെയാണ് സംശയം ബലപ്പെട്ടത്,പരാതിയെത്തുടർന്ന് സ്ഥലത്തെത്തിയ അധികൃതർ അരി പരിശോധിച്ചു. പ്രാഥമിക പരിശോധനയിൽ അരി ഭക്ഷ്യയോഗ്യമല്ലെന്ന് ഇവർ അറിയിച്ചിട്ടുണ്ട്.

അരിയിൽ നീലനിറം വരാനുള്ള കാരണം എന്താണെന്ന് വ്യക്തമായിട്ടില്ല. അരിയിൽ മായം കലർന്നതാണോ അതോ രാസവസ്തുക്കളുടെ സാന്നിധ്യമാണോ എന്ന് കണ്ടെത്തേണ്ടതുണ്ട്. ഇതിനുള്ള കാരണം തേടുകയാണ് ബിജുവും നാട്ടുകാരും. വിശദമായ പരിശോധനയ്ക്കായി ഭക്ഷ്യസുരക്ഷാ വകുപ്പിനെ സമീപിക്കാനാണ് തീരുമാനം.