പുത്തൻചന്തയിൽ കെഎസ്ആർടിസി ബസ് നിയന്ത്രണം വിട്ട് അപകടം: വൻ ഗതാഗതക്കുരുക്ക്, സ്കൂൾ കുട്ടികൾ വലഞ്ഞു…സ്കൂൾ വിട്ട് കൃത്യസമയത്ത് കുട്ടികൾ വീട്ടിലെത്താതിരുന്നതോടെ രക്ഷിതാക്കൾ വൻ പരിഭ്രാന്തിയിലായി

പുത്തൻചന്തക്കും വരിക്കാനി കവലക്കും ഇടയിൽ കെഎസ്ആർടിസി ബസ് നിയന്ത്രണം വിട്ട് ഒന്നിലധികം വാഹനങ്ങളിൽ തട്ടി അപകടം. അപകടത്തെത്തുടർന്ന് ഡ്രൈവർമാർ തമ്മിലുണ്ടായ തർക്കവും വാഹനങ്ങൾ റോഡിൽ നിന്ന് മാറ്റാത്തതും മൂലം മണിക്കൂറുകളോളം ഗതാഗതം തടസ്സപ്പെട്ടു. നിയന്ത്രണം വിട്ട കെഎസ്ആർടിസി ബസ് പാതയോരത്തെ വിവിധ വാഹനങ്ങളിൽ ഇടിക്കുകയായിരുന്നു. അപകടത്തിൽപ്പെട്ട വാഹനങ്ങൾ റോഡിന് നടുവിൽ തന്നെ നിർത്തിയിട്ട് ഡ്രൈവർമാർ തർക്കത്തിലേർപ്പെട്ടത് ഗതാഗതം പൂർണ്ണമായും സ്തംഭിപ്പിച്ചു. വൈകുന്നേരത്തെ തിരക്കേറിയ സമയമായതിനാൽ നിരവധി സ്കൂൾ ബസ്സുകളാണ് കുരുക്കിൽപ്പെട്ടത്.

രക്ഷകർത്താക്കളുടെ ആശങ്ക

സ്കൂൾ വിട്ട് കൃത്യസമയത്ത് കുട്ടികൾ വീട്ടിലെത്താതിരുന്നതോടെ രക്ഷിതാക്കൾ വൻ പരിഭ്രാന്തിയിലായി. ഫോൺ കോളുകൾ വഴി വിവരം അന്വേഷിച്ചെങ്കിലും വൻ ഗതാഗതക്കുരുക്കാണെന്ന മറുപടിയാണ് ലഭിച്ചത്. കിലോമീറ്ററുകളോളം വാഹനങ്ങളുടെ നിര നീണ്ടതോടെ കുട്ടികൾ മണിക്കൂറുകളോളം ബസ്സിലിരുന്ന് വലഞ്ഞു.