വള്ളിയാംകാവിൽ കുടിവെള്ള ക്ഷാമത്തിന് പരിഹാരമാകുന്നു; പൈപ്പ് ലൈൻ ജോലികൾ ആരംഭിച്ചു

വള്ളിയാംകാവ്: ഏറെ നാളായി പ്രദേശവാസികൾ അനുഭവിച്ചു വരുന്ന കടുത്ത കുടിവെള്ള ക്ഷാമത്തിന് ശാശ്വത പരിഹാരമാകുന്നു. കുപ്പക്കയം വാർഡ് കോൺഗ്രസ് കമ്മിറ്റിയുടെ നിരന്തരമായ ഇടപെടലിനെത്തുടർന്നാണ് ഇപ്പോൾ യുദ്ധകാലാടിസ്ഥാനത്തിൽ നടപടികൾ ആരംഭിച്ചിരിക്കുന്നത്.

കടുത്ത ജലക്ഷാമം നേരിടുന്ന വള്ളിയാംകാവ് മേഖലയിലെ പ്രശ്നങ്ങൾ നേരിട്ട് ബോധ്യപ്പെടാൻ കോൺഗ്രസ് വാർഡ് കമ്മിറ്റിയുടെ നിർദ്ദേശപ്രകാരം അഴുത ബ്ലോക്ക് പഞ്ചായത്ത് വൈസ് പ്രസിഡന്റ് ജോൺ പി. തോമസ് സ്ഥലത്തെത്തിയിരുന്നു. പ്രദേശവാസികളുമായി അദ്ദേഹം സംവദിക്കുകയും നിലവിലെ കുടിവെള്ള പദ്ധതിയുടെ പോരായ്മകൾ നേരിട്ട് വിലയിരുത്തുകയും ചെയ്തു.

പദ്ധതിയുടെ അപാകതകൾ പരിഹരിക്കാൻ വൈകുന്നതിൽ കരാറുകാരനെ നേരിട്ട് വിളിച്ചു വരുത്തിയ വൈസ് പ്രസിഡന്റ്, അടിയന്തരമായി ജലക്ഷാമം പരിഹരിക്കാനുള്ള കർശന നിർദ്ദേശങ്ങൾ നൽകി. ഇതിന്റെ അടിസ്ഥാനത്തിൽ പുതിയ പൈപ്പുകൾ സ്ഥാപിക്കുന്നതുൾപ്പെടെയുള്ള ജോലികൾ ഇപ്പോൾ ആരംഭിച്ചു കഴിഞ്ഞു.