മികച്ച വെറ്ററിനറി സർജൻ ഡോ. നെൽസൺ എം. മാത്യുവിനെ പാറത്തോട് ഗ്രാമപഞ്ചായത്ത് ആദരിച്ചു

പാറത്തോട്: കേരള സർക്കാരിന്റെ മൃഗസംരക്ഷണ വകുപ്പ് സംസ്ഥാനത്തെ മികച്ച വെറ്ററിനറി സർജനായി തിരഞ്ഞെടുത്ത ഡോ. നെൽസൺ എം. മാത്യുവിനെ പാറത്തോട് ഗ്രാമപഞ്ചായത്ത് ഭരണസമിതി ആദരിച്ചു. മൃഗസംരക്ഷണ മേഖലയിലെ മികച്ച സേവനങ്ങളും പദ്ധതി നിർവഹണത്തിലെ മികവും പരിഗണിച്ചാണ് അദ്ദേഹത്തിന് ഈ സംസ്ഥാന പുരസ്കാരം ലഭിച്ചത്.

പഞ്ചായത്ത് ഹാളിൽ നടന്ന ചടങ്ങിൽ പ്രസിഡന്റ് അന്നമ്മ വർഗീസ് ഡോക്ടറെ പൊന്നാട അണിയിച്ച് ഉപഹാരം നൽകി. ഗ്രാമപ്രദേശങ്ങളിലെ കർഷകർക്കും വളർത്തുമൃഗങ്ങൾക്കും കൃത്യസമയത്ത് ചികിത്സയും സേവനങ്ങളും ലഭ്യമാക്കുന്നതിൽ ഡോ. നെൽസൺ കാണിക്കുന്ന ജാഗ്രത മാതൃകാപരമാണെന്ന് പ്രസിഡന്റ് അഭിപ്രായപ്പെട്ടു.

വൈസ് പ്രസിഡന്റ് ഡയസ് കോക്കാട്ട്, മറ്റു ജനപ്രതിനിധികൾ, പഞ്ചായത്ത് ഉദ്യോഗസ്ഥർ എന്നിവർ ചടങ്ങിൽ സംബന്ധിച്ചു. മൃഗസംരക്ഷണ മേഖലയിൽ താൻ നടത്തുന്ന പ്രവർത്തനങ്ങൾക്കുള്ള വലിയൊരു അംഗീകാരമാണ് ഈ പുരസ്കാരമെന്നും, കർഷകരുടെ ഉന്നമനത്തിനായി ഇനിയും തുടർന്നു പ്രവർത്തിക്കുമെന്നും മറുപടി പ്രസംഗത്തിൽ ഡോ. നെൽസൺ എം. മാത്യു പറഞ്ഞു.