പൊൻകുന്നം പുതിയകാവ് ക്ഷേത്ര കാണിക്കവഞ്ചിയുടെ ചില്ല് തകർത്തു; മാനസികാസ്വാസ്ഥ്യമുള്ളയാൾ പിടിയിൽ
പൊൻകുന്നം: പുതിയകാവ് ദേവീക്ഷേത്രത്തിന്റെ പൊൻകുന്നം ബസ് സ്റ്റാൻഡിലെ കാണിക്കവഞ്ചിയുടെ ചില്ല് എറിഞ്ഞുടച്ച നിലയിൽ കണ്ടെത്തി. വ്യാഴാഴ്ച രാവിലെയാണ് കാണിക്കവഞ്ചിയുടെ ചില്ല് തകർന്ന നിലയിൽ കണ്ടത്. കല്ല് കാണിക്കവഞ്ചിയുടെ ഉള്ളിലുണ്ടായിരുന്നു.
ദേവസ്വംഭാരവാഹികൾ പോലീസിൽ പരാതി നൽകിയതിനെ തുടർന്ന് അന്വേഷണം നടത്തിയ പോലീസ് മാനസികാസ്വാസ്ഥ്യമുള്ളയാളെ കസ്റ്റഡിയിലെടുത്തു. ഇയാൾ കല്ലെറിഞ്ഞ് കാണിക്കവഞ്ചിയുടെ ചില്ലുടയ്ക്കുകയായിരുന്നുവെന്ന് പോലീസ് പറഞ്ഞു. പാമ്പാടി സ്വദേശിയായ ഇയാളുടെ കുടുംബാംഗങ്ങളെത്തി രോഗവിവരം ബോധ്യപ്പെടുത്തിയതിനെ തുടർന്ന് താക്കീത് നൽകി വിട്ടയച്ചു.
