ചെറുകിട വ്യാപാരികളുടെ വയറ്റത്തടിച്ച് സ്കൂൾ മാനേജ്മെന്റുകൾ; വിദ്യാലയങ്ങൾ കേന്ദ്രീകരിച്ച് നടത്തുന്ന അനധികൃത പഠനസാമഗ്രി വിൽപനയ്ക്കെതിരെ പ്രതിഷേധവുമായി വ്യാപാരി വ്യവസായി സമിതി കാഞ്ഞിരപ്പള്ളി ഏരിയ കമ്മിറ്റി
കാഞ്ഞിരപ്പള്ളി: പുതിയ അധ്യയന വർഷം ആരംഭിച്ചതോടെ സ്കൂൾ മാനേജ്മെന്റുകൾ നേരിട്ട് നടത്തുന്ന നോട്ടുബുക്കുകളുടെയും മറ്റ് പഠന സാമഗ്രികളുടെയും അനധികൃത വിൽപന അവസാനിപ്പിക്കണമെന്ന് കേരള സംസ്ഥാന വ്യാപാരി വ്യവസായി സമിതി കാഞ്ഞിരപ്പള്ളി ഏരിയ കമ്മിറ്റി ആവശ്യപ്പെട്ടു.
• നിയമലംഘനം: വിദ്യാലയങ്ങളിൽ പഠനസാമഗ്രികൾ വിൽക്കുന്നത് നിരോധിച്ചുകൊണ്ടുള്ള 2006-ലെ വിദ്യാഭ്യാസ വകുപ്പ് സർക്കുലർ (4487/9/എ2/05/പൊ.വി.വ) നിലനിൽക്കെയാണ് പല സ്കൂളുകളും കച്ചവടം തുടരുന്നത്.
• നിർബന്ധിത വിൽപന: ഹോൾസെയിൽ വ്യാപാരികളിൽ നിന്ന് സാധനങ്ങൾ നേരിട്ടെത്തിച്ച് സ്കൂൾ അധികൃതർ വലിയ വിലയ്ക്ക് കുട്ടികൾക്ക് നിർബന്ധപൂർവ്വം വിൽക്കുകയാണ്.
• വ്യാപാരികളുടെ പ്രതിസന്ധി: സ്കൂളുകൾ കച്ചവടം ഏറ്റെടുക്കുന്നതോടെ ടൈലറിംഗ് ഷോപ്പുകൾ, സ്റ്റേഷനറി കടകൾ, ബുക്ക് സ്റ്റാളുകൾ, ടെക്സ്റ്റൈൽസ് തുടങ്ങിയ ചെറുകിട വ്യാപാരികളുടെ ഉപജീവനമാർഗ്ഗം തടസ്സപ്പെടുന്നു.
• അധ്യാപകർ കച്ചവടക്കാരാകുന്നു: വിദ്യ പകർന്നു നൽകേണ്ട അധ്യാപകർ തന്നെ വിൽപനക്കാരായി മാറുന്ന പ്രവണത ദൗർഭാഗ്യകരമാണെന്ന് സമിതി ചൂണ്ടിക്കാട്ടി.
അനധികൃത കച്ചവടങ്ങൾ ഉടൻ അവസാനിപ്പിക്കണമെന്നും, തങ്ങൾക്ക് ഇഷ്ടമുള്ള കടകളിൽ നിന്ന് പഠന സാമഗ്രികൾ വാങ്ങാനുള്ള സ്വാതന്ത്ര്യം കുട്ടികൾക്ക് ഉറപ്പാക്കണമെന്നും സമിതി സർക്കാരിനോട് ആവശ്യപ്പെട്ടു. നിയമലംഘനം നടത്തുന്ന സ്കൂൾ അധികൃതർക്കെതിരെ സർക്കാർ അടിയന്തരമായി ഇടപെടണമെന്നും യോഗം ആവശ്യപ്പെട്ടു.
ഏരിയ കമ്മിറ്റി പ്രസിഡന്റ് സി.വി. അനിൽകുമാർ യോഗത്തിൽ അധ്യക്ഷത വഹിച്ചു. ഭാരവാഹികളായ അനിൽ സുനിത, ഷൈൻ കുമാർ, ഷാനവാസ്, ഹാരിഷ് തുടങ്ങിയവർ സംസാരിച്ചു.
