ഗാന്ധി ഘാതകർ ആഘോഷിക്കപ്പെടുന്ന കാലത്ത് അധ്യാപകരുടെ ഉത്തരവാദിത്തം വലുത്: അഡ്വ. എൻ. ഷംസുദ്ദീൻ എം.എൽ.എ

പാലക്കാട്: ഗാന്ധിജി തമസ്കരിക്കപ്പെടുകയും ഗാന്ധി ഘാതകർ ആഘോഷിക്കപ്പെടുകയും ചെയ്യുന്ന വർത്തമാന കാല ഇന്ത്യയിൽ, രാജ്യത്തിന്റെ മതേതരത്വവും ഭരണഘടനയും സംരക്ഷിക്കാൻ അധ്യാപകർക്ക് വലിയ ഉത്തരവാദിത്തമുണ്ടെന്ന് മുസ്ലിം ലീഗ് സംസ്ഥാന സെക്രട്ടറി അഡ്വ. എൻ. ഷംസുദ്ദീൻ എം.എൽ.എ പ്രസ്താവിച്ചു. പാലക്കാട് ധോണി ലീഡ്സ് കോളേജിൽ നടന്ന കെ.എസ്.ടി.യു (KSTU) വനിതാ വിംഗ് സംസ്ഥാന എക്സിക്യൂട്ടീവ് ക്യാമ്പ് ‘Elevate 2K26’ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.

ഭരണഘടനയെയും മതേതര മൂല്യങ്ങളെയും സംരക്ഷിക്കാനുള്ള പോരാട്ടത്തിന് കെ.എസ്.ടി.യു നേതൃത്വം നൽകണം. വനിതാ സംവരണത്തിന്റെ പേരിൽ ജനാധിപത്യത്തെ അട്ടിമറിക്കാനുള്ള നീക്കങ്ങളെ മതേതര രാഷ്ട്രീയ പക്ഷത്തിന്റെ ഐക്യം കൊണ്ട് പ്രതിരോധിക്കാൻ കഴിഞ്ഞത് ശുഭസൂചകമാണെന്നും അദ്ദേഹം കൂട്ടിച്ചേർത്തു. അധ്യാപക മേഖലയിൽ കൃത്യമായ നിലപാടുകളുള്ള സംഘടന എന്ന നിലയിൽ കെ.എസ്.ടി.യുവിൽ അംഗത്വമെടുക്കുന്നത് അധ്യാപകർ അഭിമാനമായാണ് കാണുന്നതെന്നും അദ്ദേഹം പറഞ്ഞു.

• ആദരിക്കൽ: ഈ വർഷം സർവീസിൽ നിന്നും വിരമിക്കുന്ന കെ.പി. നീന, ആമിന സി, ഷെമിന അഷ്റഫ്, സജീന സുലൈമാൻ, സുഹറ ടീച്ചർ എന്നിവരെ എം.എൽ.എ ഉപഹാരങ്ങൾ നൽകി ആദരിച്ചു.

• ചർച്ചകൾ: വിദ്യാഭ്യാസ മേഖലയിലെ അടിസ്ഥാന പ്രശ്നങ്ങൾ 13 ഗ്രൂപ്പുകളായി തിരിഞ്ഞ് ക്യാമ്പ് പ്രതിനിധികൾ ചർച്ച ചെയ്യുകയും റിപ്പോർട്ടുകൾ അവതരിപ്പിക്കുകയും ചെയ്തു.

വനിതാ വിംഗ് സംസ്ഥാന ചെയർപേഴ്സൺ ഷെരീഫ ടീച്ചർ ചടങ്ങിൽ അധ്യക്ഷത വഹിച്ചു. കെ.എസ്.ടി.യു സംസ്ഥാന പ്രസിഡന്റ് കെ.എം. അബ്ദുള്ള, ജനറൽ സെക്രട്ടറി കല്ലൂർ മുഹമ്മദലി, ട്രഷറർ സിദ്ധിഖ് പാറോക്കോട്, സംസ്ഥാന ഭാരവാഹികളായ പി.ടി.എം. ഷറഫുന്നീസ, ഷാഹിന എൻ.കെ, വനിതാ വിംഗ് ഭാരവാഹികളായ കെ.എം. സാലിഹ, കെ. സാജിത, പൊന്നുമോൾ, ഷീനമോൾ എന്നിവർ സംസാരിച്ചു.

രണ്ടാം ദിവസത്തെ സെഷനുകൾക്ക് കദീജ അമ്മന്നൂർ, മുനീർ കെ, ജംഷീർ പി എന്നിവർ നേതൃത്വം നൽകും. സമാപന സെഷനിൽ മുസ്ലിം ലീഗ് ജില്ലാ ആക്ടിംഗ് ജനറൽ സെക്രട്ടറി പി.എ.എ. സലാം, സൈതലവി പൂളക്കാട് എന്നിവർ പങ്കെടുക്കും.