കാഞ്ഞിരപ്പള്ളിയിൽ എച്ച്1എൻ1 ബാധിച്ച് മരണം; ആശങ്കപ്പെടേണ്ട സാഹചര്യമില്ലെന്ന് ആരോഗ്യവകുപ്പ്
കാഞ്ഞിരപ്പള്ളി: കാഞ്ഞിരപ്പള്ളിയിൽ എച്ച്1എൻ1 (H1N1) ബാധിച്ച് ഒരാൾ മരണമടഞ്ഞു. കാഞ്ഞിരപ്പള്ളി കപ്പാട് സ്വദേശി ജയ്സൺ ജോസഫ് ആണ് മരിച്ചത്. കഴിഞ്ഞ ദിവസം മരണമടഞ്ഞ ഇദ്ദേഹത്തിന് എച്ച്1എൻ1 രോഗബാധയുണ്ടായിരുന്നതായി കഴിഞ്ഞ ദിവസത്തെ പരിശോധനാ ഫലങ്ങളിലാണ് സ്ഥിരീകരിച്ചത്.
രോഗബാധ സ്ഥിരീകരിച്ചതിനെ തുടർന്ന് പ്രദേശത്ത് ആരോഗ്യവകുപ്പ് പ്രതിരോധ നടപടികൾ ശക്തമാക്കിയിട്ടുണ്ട്. എന്നാൽ നിലവിൽ പൊതുജനങ്ങൾ ആശങ്കപ്പെടേണ്ട യാതൊരു സാഹചര്യവുമില്ലെന്ന് ആരോഗ്യവകുപ്പ് അധികൃതർ വ്യക്തമാക്കി. പനി, കടുത്ത ശരീരവേദന, ചുമ തുടങ്ങിയ ലക്ഷണങ്ങൾ ഉള്ളവർ സ്വയംചികിത്സയ്ക്ക് മുതിരാതെ എത്രയും വേഗം കൃത്യമായ വൈദ്യസഹായം തേടണമെന്നും ആരോഗ്യ അധികൃതർ നിർദേശിക്കുന്നു.
