കൊമ്പുകുത്തി ഗവ. ട്രൈബൽ ഹൈസ്കൂളിൽ ‘വർണ്ണം 2026’ ആഘോഷിച്ചു; മാഗസിൻ പ്രകാശനം നടന്നു

കോരുത്തോട്: കൊമ്പുകുത്തി ഗവൺമെന്റ് ട്രൈബൽ ഹൈസ്കൂളിലെ ഈ വർഷത്തെ വാർഷികാഘോഷമായ “വർണ്ണം 2026” ഉജ്ജ്വലമായി നടന്നു. വാർഷികാഘോഷത്തോടൊപ്പം സ്കൂൾ മാഗസിൻ പ്രകാശനവും, കുട്ടികൾ തയ്യാറാക്കിയ കാർട്ടൂൺ ഡയറിയുടെ ഉദ്ഘാടനവും കോരുത്തോട് ഗ്രാമപഞ്ചായത്ത് മൂന്നാം വാർഡ് മെമ്പർ ശ്രീ. കെ.ആർ. സെയ്ൻ നിർവ്വഹിച്ചു.

വിദ്യാർത്ഥികളുടെ സർഗ്ഗാത്മക കഴിവുകളെ പ്രോത്സാഹിപ്പിക്കുന്ന ഇത്തരം പ്രവർത്തനങ്ങൾ മാതൃകാപരമാണെന്ന് അദ്ദേഹം ഉദ്ഘാടന പ്രസംഗത്തിൽ പറഞ്ഞു.

ചടങ്ങിൽ മുൻ ഗ്രാമപഞ്ചായത്ത് മെമ്പർ ശ്രീമതി ലതാ സുശീലൻ, ഊരുകൂട്ടം പ്രസിഡന്റ് ശ്രീ വി.എം വിശ്വനാഥൻ, പി.ടി.എ വൈസ് പ്രസിഡന്റ് ശ്രീമതി ബിൻസി മനോജ്, എസ്.എം.സി ചെയർപേഴ്സൺ ശ്രീമതി മിന്നു പി.സി തുടങ്ങിയവർ സംസാരിച്ചു. സ്കൂളിലെ പഠന-പഠനേതര പ്രവർത്തനങ്ങളിൽ അധ്യാപകരും രക്ഷിതാക്കളും പുലർത്തുന്ന ഐക്യം യോഗത്തിൽ പ്രശംസിക്കപ്പെട്ടു.

ശ്രീമതി ആര്യ സി. മോഹനൻ ചടങ്ങിന് നന്ദി രേഖപ്പെടുത്തി. ഔദ്യോഗിക ചടങ്ങുകൾക്ക് ശേഷം വിദ്യാർത്ഥികളുടെ വിവിധ കലാപരിപാടികൾ അരങ്ങേറി. കുട്ടികളുടെ നൃത്തം, സംഗീതം, നാടകം തുടങ്ങിയവ കാണികൾക്ക് ഹൃദ്യമായ അനുഭവമായി.