‘ഇറക്കുമതി സ്ഥാനാർത്ഥി വേണ്ട’; അലോഷ്യസ് സേവ്യറിനെതിരെ പൂഞ്ഞാറിൽ പ്രതിഷേധം, വ്യാപകമായി പോസ്റ്ററുകൾ

പൂഞ്ഞാർ: വരാനിരിക്കുന്ന തിരഞ്ഞെടുപ്പിൽ കെ.എസ്.യു സംസ്ഥാന പ്രസിഡന്റ് അലോഷ്യസ് സേവ്യറിനെ പൂഞ്ഞാറിൽ സ്ഥാനാർത്ഥിയാക്കാനുള്ള നീക്കത്തിനെതിരെ കോൺഗ്രസിനുള്ളിൽ പരസ്യ പ്രതിഷേധം. ‘ഇറക്കുമതി സ്ഥാനാർത്ഥികളെ ഞങ്ങൾക്ക് വേണ്ട’ എന്ന വാചകത്തോടെ പൂഞ്ഞാറിലെ വിവിധ ഭാഗങ്ങളിൽ അജ്ഞാതർ പോസ്റ്ററുകൾ പതിപ്പിച്ചു.

പ്രാദേശിക നേതാക്കളെ അവഗണിച്ച് പുറത്തുനിന്നുള്ളവർക്ക് സീറ്റ് നൽകുന്നത് അംഗീകരിക്കില്ലെന്നാണ് ഒരു വിഭാഗം പ്രവർത്തകരുടെ നിലപാട്. മണ്ഡലവുമായി അടുത്ത ബന്ധമുള്ള, ജനങ്ങൾക്കിടയിൽ പ്രവർത്തിക്കുന്ന പ്രാദേശിക നേതാക്കൾക്ക് മുൻഗണന നൽകണമെന്നും പോസ്റ്ററുകൾ ആവശ്യപ്പെടുന്നു.

സീറ്റ് വിഭജന ചർച്ചകൾ പുരോഗമിക്കെ ഉയർന്നുവന്ന ഈ പ്രതിഷേധം കോൺഗ്രസ് നേതൃത്വത്തെ പ്രതിരോധത്തിലാക്കിയിട്ടുണ്ട്. എന്നാൽ ഇത് പാർട്ടി വിരുദ്ധരുടെ പണിയാണെന്നും പ്രവർത്തകർ ഒറ്റക്കെട്ടാണെന്നുമാണ് ഒരു വിഭാഗം നേതാക്കളുടെ വിശദീകരണം.