അംഗീകാരത്തിന്റെ തിളക്കത്തിൽ മുണ്ടക്കയത്തിന്റെ അഭിമാനമായി ഡിവൈഎസ്പി എ.ജെ. തോമസ്; മൂന്നാം തവണയും ബാഡ്ജ് ഓഫ് ഹോണർ…അഭിഭാഷകനിൽ നിന്നും മികച്ച പോലീസ് ഓഫീസറിലേക്ക്

കോട്ടയം: വിശിഷ്ട സേവനത്തിനുള്ള സംസ്ഥാന പോലീസ് മേധാവിയുടെ 2024-ലെ ഉന്നത ബഹുമതിയായ ‘ബാഡ്ജ് ഓഫ് ഹോണർ’ (Badge of Honour) പുരസ്കാരം സ്റ്റേറ്റ് സ്പെഷ്യൽ ബ്രാഞ്ച് കോട്ടയം ജില്ലാ ഡെപ്യൂട്ടി പോലീസ് സൂപ്രണ്ട് ശ്രീ. എ.ജെ. തോമസിന്. മുണ്ടക്കയം വണ്ടൻപതാൽ സ്വദേശിയായ ഇദ്ദേഹത്തിന്റെ കരിയറിലെ മികച്ച പ്രവർത്തനങ്ങൾക്കുള്ള ഔദ്യോഗിക അംഗീകാരമാണിത്.ഇത് മൂന്നാം തവണയാണ് അദ്ദേഹം ബാഡ്ജ് ഓഫ് ഹോണറിന് അർഹനാകുന്നത്.

പോലീസ് സേനയിലെ നിസ്വാർത്ഥമായ സേവനവും അന്വേഷണ മികവും കണക്കിലെടുത്താണ് ഈ പുരസ്കാരം നൽകപ്പെടുന്നത്. “അവാർഡുകൾക്ക് നിറമുണ്ടാകുന്നത് അത് അർഹരുടെ നെഞ്ചിലേറുമ്പോഴാണ്” എന്ന വാചകത്തെ അന്വർത്ഥമാക്കുന്നതാണ് എ.ജെ. തോമസിന്റെ ഈ നേട്ടം.

സേവന മികവിന്റെ നാൾവഴികൾ

ഇതുവരെ 166 ഗുഡ് സർവീസ് എൻട്രികളും 20 അപ്രൈസേഷൻ സർട്ടിഫിക്കറ്റുകളും കരസ്ഥമാക്കിയിട്ടുള്ള എ.ജെ. തോമസ്, അന്വേഷണ മികവിലും ഔദ്യോഗിക കൃത്യനിർവ്വഹണത്തിലും മാതൃകാപരമായ പ്രവർത്തനമാണ് കാഴ്ചവെക്കുന്നത്. അഭിഭാഷകനായി ഔദ്യോഗിക ജീവിതം ആരംഭിച്ച അദ്ദേഹം പിന്നീട് പോലീസ് സേനയിലെത്തുകയായിരുന്നു.

കുടുംബം, വിദ്യാഭ്യാസം

മുണ്ടക്കയം വണ്ടൻപതാൽ അരമറ്റംവയലിൽ ജോസഫ് – അന്നമ്മ ദമ്പതികളുടെ ഏഴ് മക്കളിൽ നാലാമനാണ്. മുരിക്കുംവയൽ ഗവൺമെന്റ് സ്കൂളിലെ പ്രാഥമിക വിദ്യാഭ്യാസത്തിന് ശേഷം കാഞ്ഞിരപ്പള്ളി സെന്റ് ഡൊമിനിക്സ് കോളേജിൽ നിന്നും ഉപരിപഠനം പൂർത്തിയാക്കി. തുടർന്ന് എൽ.എൽ.ബി (LLB) ബിരുദം നേടിയ അദ്ദേഹം പൊൻകുന്നം കോടതിയിൽ അഭിഭാഷകനായി പ്രാക്ടീസ് ചെയ്തിരുന്നു.

തന്റെ ഔദ്യോഗിക ജീവിതത്തിൽ ഉടനീളം ജനപക്ഷത്തുനിന്ന് പ്രവർത്തിക്കുന്ന ഉദ്യോഗസ്ഥൻ എന്ന നിലയിൽ ശ്രദ്ധേയനായ അദ്ദേഹം, കോട്ടയം ജില്ലയിലെ സ്പെഷ്യൽ ബ്രാഞ്ച് പ്രവർത്തനങ്ങളിൽ നിർണ്ണായകമായ പങ്കുവഹിച്ചുവരുന്നു. ഈ നേട്ടത്തിൽ അദ്ദേഹത്തിന്റെ ജന്മനാടായ വണ്ടൻപതാലിലും സഹപ്രവർത്തകർക്കിടയിലും വലിയ ആഹ്ലാദമാണ് നിലനിൽക്കുന്നത്.