പ്ലാശ്നാലിൽ വോട്ട് രേഖപ്പെടുത്തി പൂഞ്ഞാർ യുഡിഎഫ് സ്ഥാനാർത്ഥി അഡ്വ. സെബാസ്റ്റ്യൻ എം.ജെ (സജി ജോസഫ്)

പാലാ: പൂഞ്ഞാർ നിയോജകമണ്ഡലത്തിലെ യുഡിഎഫ് സ്ഥാനാർത്ഥി അഡ്വ. സെബാസ്റ്റ്യൻ എം.ജെ (സജി ജോസഫ്) തന്റെ സമ്മതിദാനാവകാശം വിനിയോഗിച്ചു. പാലാ നിയോജകമണ്ഡലത്തിൽ ഉൾപ്പെടുന്ന പ്ലാശ്നാൽ സെന്റ് ആന്റണീസ് ഹയർ സെക്കൻഡറി സ്കൂളിലെ 83-ാം നമ്പർ ബൂത്തിലെത്തിയാണ് അദ്ദേഹം വോട്ട് രേഖപ്പെടുത്തിയത്.

കുടുംബസമേതമാണ് അദ്ദേഹം പോളിംഗ് സ്റ്റേഷനിലെത്തിയത്. വോട്ട് ചെയ്ത ശേഷം മാധ്യമപ്രവർത്തകരോട് സംസാരിച്ച അദ്ദേഹം, പൂഞ്ഞാർ മണ്ഡലത്തിൽ ഇത്തവണ യുഡിഎഫിന് അനുകൂലമായ വലിയ തരംഗമുണ്ടെന്നും ജയമുറപ്പാണെന്നും ആത്മവിശ്വാസം പ്രകടിപ്പിച്ചു. മണ്ഡലത്തിലെ വികസന മുരടിപ്പിനും രാഷ്ട്രീയ അസ്ഥിരതയ്ക്കും എതിരെ ജനങ്ങൾ വിധി എഴുതുമെന്നും അദ്ദേഹം കൂട്ടിച്ചേർത്തു.

രാവിലെ മുതൽ തന്നെ പ്ലാശ്നാലിലെ വിവിധ ബൂത്തുകളിൽ വോട്ടർമാരുടെ നീണ്ട നിര ദൃശ്യമായിരുന്നു. വോട്ട് രേഖപ്പെടുത്തിയ ശേഷം സ്ഥാനാർത്ഥി പൂഞ്ഞാർ മണ്ഡലത്തിലെ വിവിധ ബൂത്തുകൾ സന്ദർശിക്കാനായി പുറപ്പെട്ടു.