എം.ജി യൂണിവേഴ്സിറ്റി എൻ.എസ്.എസ് അവാർഡ് തിളക്കത്തിൽ എരുമേലി എം.ഇ.എസ് കോളേജ്

എരുമേലി: മഹാത്മാഗാന്ധി സർവകലാശാലയുടെ 2024-25 വർഷത്തെ നാഷണൽ സർവീസ് സ്കീം (NSS) അവാർഡുകളിൽ മികച്ച നേട്ടം കൈവരിച്ച് എരുമേലി എം.ഇ.എസ് കോളേജ്. മികച്ച എൻ.എസ്.എസ് യൂണിറ്റിനുള്ള അപ്രീസിയേഷൻ അവാർഡിന് കോളേജ് അർഹമായി. കൂടാതെ, കോളേജിലെ അധ്യാപകനായ സെബാസ്റ്റ്യൻ പി. സേവ്യറെ മികച്ച പ്രോഗ്രാം ഓഫീസറായും തിരഞ്ഞെടുത്തു.

കഴിഞ്ഞ വർഷങ്ങളിൽ എൻ.എസ്.എസ് യൂണിറ്റ് നടപ്പിലാക്കിയ മാതൃകാപരമായ പ്രവർത്തനങ്ങളാണ് ഈ അംഗീകാരത്തിന് പിന്നിൽ. പ്രത്യേകിച്ച്, അശരണർക്കായി നിർമ്മിച്ചു നൽകിയ ‘സ്നേഹവീട്’ പദ്ധതിയും, യൂണിറ്റ് ഏറ്റെടുത്തു നടത്തിയ വിവിധ സാമൂഹിക പ്രതിബദ്ധതയുള്ള പ്രവർത്തനങ്ങളും സർവകലാശാലയുടെ പ്രത്യേക പ്രശംസ പിടിച്ചുപറ്റി.

സർവകലാശാല വൈസ് ചാൻസലറിൽ നിന്നും കോളേജ് പ്രോഗ്രാം ഓഫീസർമാരായ സെബാസ്റ്റ്യൻ പി. സേവ്യർ, കെ.കെ. സന്തോഷ്, കെ.എസ്. ജിതേഷ് എന്നിവർ ചേർന്ന് അവാർഡ് ഏറ്റുവാങ്ങി. ക്യാമ്പസിനകത്തും പുറത്തും എൻ.എസ്.എസ് യൂണിറ്റ് നടത്തിവരുന്ന സേവനപ്രവർത്തനങ്ങൾക്കുള്ള വലിയൊരു അംഗീകാരമാണ് ഈ പുരസ്കാരമെന്ന് കോളേജ് അധികൃതർ അറിയിച്ചു.